კატეგორიები

ნავიგაცია

ჩემი ფინანსური მეგზური

სარემონტო ხარჯები

სარემონტო სამუშაოების დაგეგმვა არაერთ პირდაპირ და არაპირდაპირ ხარჯს უკავშირდება. მოსალოდნელი ხარჯების სწორად დაგეგმვასა და ახალ გამოწვევებთან შეხვედრისთვის მოსამზადებლად ქვემოთ ჩამოთვლილი ტიპური ხარჯების გაცნობა დაგეხმარებათ. 

ალტერნატიული ფართის მოძიების ხარჯი

ამ ტიპის ხარჯი დაგჭირდებათ მაშინ, თუ რემონტს აკეთებთ თქვენს საცხოვრებელ ფართში და ამასთანავე რემონტის მასშტაბები არსებულ ფართში დარჩენის შესაძლებლობას გამორიცხავს.

ძველი რემონტისა და ტიხრების დემონტაჟის ხარჯი

როგორი გასაკვირიც უნდა იყოს, საცხოვრებელი ფართის რემონტის ხარჯში ერთ-ერთი მნიშვნელოვან წილს ძველი რემონტის დემონტაჟის ხარჯები შეადგენს. ამ ეტაპზე გჭირდებათ სპეციალური მოწყობილობები, იმისთვის, რომ სრულყოფილად მოხდეს არასასურველი ტიხრებისა თუ ძველი რემონტის ნაშთების დემონტაჟი. ხშირ შემთხვევაში, ეს სამუშაო დიდი ფიზიკურ ძალასაც მოითხოვს, რაც, თავის მხრივ, შრომის ანაზღაურების მოცულობასაც ზრდის. ამიტომ მნიშვნელოვანია, თქვენს სარემონტო გუნდთან ერთად თავიდანვე განსაზღვროთ დემონტაჟის ღირებულება.

სარემონტო ნარჩენების გატანა-გადაყრის ხარჯი

ხარჯებში სარემონტო ნარჩენების გატანის ხარჯიც უნდა გაითვალისწინოთ. სამშენებლო ნარჩენების უყურადღებოდ დატოვება ნარჩენების მართვის კოდექსის მიხედვით ფულადი ჯარიმით ისჯება. იმისთვის, რომ კანონდარღვევა თავიდან აირიდოთ და ასევე, სარემონტო სივრცე სამშენებლო ნარჩენებით არ დაგეტვირთოთ, სასურველია, თუ ნარჩენებს პერიოდულად, დადგენილი ნორმების შესაბამისად, გაიტანთ. ხშირად, ამ საკითხის მოსაგვარებლად საჭიროა კონკრეტული პირების მომსახურებით სარგებლობა, რომლებიც უზრუნველყოფენ  ნარჩენების ტომრებში მოთავსებას და შესაბამისი ავტომანქანით დაშვებულ ტერიტორიაზე გადაყრას. ამ ასპექტში სასურველია, თავიდანვე გათვალოთ, რომ დაგჭირდებათ ტომრის შეძენის, ნარჩენების ტომრებში ჩაყრის, და ავტომობილის მომსახურების ხარჯი.

აქვე მნიშვნელოვანია გაითვალისწინოთ, რომ მომსახურების ხარჯის მოცულობას საცხოვრებელი ფართის ადგილმდებარეობაც განსაზღვრავს. თუ თქვენ საცხოვრებელ კორპუსში არსებულ ფართს არემონტებთ, რომელიც მაღალ სართულზეა, ხოლო კორპუსი სატვირთო ლიფტით არაა აღჭურვილი, დაგჭირდებათ დამატებითი მუშახელის მომსახურებით სარგებლობა, რომ ნარჩენები ხელით ჩაიტანონ მანქანამდე ან დაგჭირდებათ ამწის დაქირავება, რომლითაც ნარჩენებს გაიტანთ კორპუსიდან. საჭიროა აღინიშნოს, რომ ორივე მეთოდი გაზრდის ნარჩენების გატანის ხარჯს. ამიტომ უმჯობესია, დაგეგმვის ეტაპზევე მოიძიოთ ბაზარზე არსებული ფასები და ბიუჯეტში ამ ხარჯის მოცულობა შეიტანოთ თქვენთვის ყველაზე ხელსაყრელი ვარიანტის შესაბამისად. 

გასათვალისწინებელია ისიც, რომ ფართომასშტაბიანი სარემონტო სამუშაოების პარალელურად, ნარჩენების გატანა მოგიწევთ პერიოდულად და არა ერთჯერადად.

შენობაში არსებული ავეჯისა და ტექნიკის დასაწყობების ხარჯი

თუ თქვენ საცხოვრებელ ფართში უკვე გაქვთ საოჯახო ტექნიკა და ავეჯი, რომლის გამოყენებასაც რემონტის დასრულების შემდეგაც გეგმავთ, აუცილებლად დაგჭირდებათ ფართი, სადაც მათ დაასაწყობებთ რემონტის დასრულებამდე. ეს საკითხი მნიშვნელოვანია იმდენად, რამდენადაც დამატებით ხარჯს უკავშირდება. სასურველია, თავიდანვე განსაზღვროთ ამ ნივთების ტრანსპორტირებისა და დასაწყობების ხარჯის მოცულობა.

ხელოსნების მომსახურების ანაზღაურება 

ხარჯების კუთხით ეს ერთ-ერთი მნიშვნელოვანი ფაქტორია. იმისთვის, რომ ხარჯები ძალიან არ გაგეზარდოთ, სასურველია, თუ სარემონტო სამუშაოების დაწყებამდე მოიძიებთ არსებულ ფასებს და კონკრეტულ პირებს მომსახურების ღირებულებაზე ისე შეუთანხმდებით. ბაზარზე შეხვდებით ორ ალტერნატივას, მოიძიოთ თითოეული სპეციალისტი ინდივიდუალურად ან დაიქირაოთ ხელოსნების ჯგუფი. ტექნიკურად ბევრად გაგიმარტივდებათ ჯგუფთან თანამშრომლობა, თუმცა საჭიროა გაითვალისწინოთ, რომ სამუშაო გუნდის აყვანა უფრო ძვირი შეიძლება დაგიჯდეთ, ვიდრე ცალკეულ ხელოსანთან შეთანხმება. არჩევანი კი, სჯობს თქვენი ბიუჯეტის მიხედვით გააკეთოთ.
ხშირად, ამ ხარჯის შემცირება საკუთარი ჩართულობითაც შეიძლება. მაგალითად, შესაძლებელია თქვენ თავადაც მოისურვოთ დემონტაჟის გაკეთება, კედლების ჩამონგრევა ან სულაც გაყვანილობის მოწესრიგება. თუ თქვენთვის ეს განსაკუთრებულ სირთულეს არ წარმოადგენს, მაშინ ხელოსნების ხარჯის მნიშვნელოვნად შემცირებას შეძლებთ.

სარემონტო მასალების შეძენის ხარჯები

სარემონტო სამუშაოებისას, ერთ-ერთი ძირითადი და ამავდროულად მსხვილი ხარჯი, სარემონტო მასალების შეძენის ხარჯია. სასურველია, თავიდანვე განსაზღვროთ, რა ტიპის მასალით გსურთ სარემონტო სამუშაოების წარმოება, რადგან მასალის ხარისხსა და მწარმოებელზეა ხშირად დამოკიდებული მასალის ფასი.

აქაც, ისევე როგორც სხვა შემთხვევაში, სასურველია, დაიწყოთ ბაზრის კვლევით და ნახოთ რა ფასებია კონკრეტულ მასალაზე სხვადასხვა გამყიდველთან. ფასთა სხვაობა შეიძლება გამოიწვიოს მასალის ადგილმდებარეობამ, გამყიდველის მიერ დამატებულმა ფასნამატმა და მასალის ხარისხმაც კი. სასურველია, სწორად განსაზღვროთ, რა არის თქვენთვის მნიშვნელოვანი მასალის არჩევისას, ხშირად ეკოლოგიურად სუფთა მასალები ბევრად უფრო ძვირია სხვა ანალოგებთან შედარებით. შესაბამისად, საჭიროა მიიღოთ გადაწყვეტილება, რის ხარჯზე შეძლებთ თანხის ეკონომიის მიღწევას. ალბათ, უმჯობესია ჯანმრთელობის ზიანის რისკის ხარჯზე არ მოხდეს ეკონომიის გაწევა და შიდა ფასადის შემთხვევაში მაინც გაკეთდეს არჩევანი გამძლე და ეკოლოგიურად სუფთა მასალებზე. 

მასალების ტრანსპორტირებისა და დასაწყობების ხარჯები

ხშირად მასალებთან დაკავშირებული ხარჯები მათი შესყიდვით არ სრულდება. მასალის ყიდვის შემდგომ სარემონტო სამუშაოებამდე მიტანა და ისე დასაწყობება, რომ სამუშაოებს ხელი არ შეუშალოს, ცალკე გამოწვევაა. ამ საკითხის მოგვარებას ზოგჯერ თავად გამყიდველი კომპანიები სთავაზობენ მომხმარებლებს. რიგ შემთხვევებში კონკრეტული ვადითაც კი (მაგალითად, 2 კვირიდან 1 თვემდე ვადით) ინახავენ გაყიდულ საქონელს საკუთარ საწყობში. ეს ნიშნავს, რომ შეგიძლიათ შეიძინოთ მასალა საჭირო დროზე ადრე, ხოლო საჭიროების დადგომისთანავე მარტივად გაიტანოთ ის. ხარჯების დაზოგვაში დაგეხმარებათ მასალის მიტანის მომსახურებაც. ზოგიერთი კომპანია ან გამყიდველი პირი შესაძლოა მასალის ადგილამდე მიტანას შეღავათიან ფასად ან დამატებითი საზღაურის გარეშეც გთავაზობდეთ. შესაძლოა, ეს შემოთავაზება დამოკიდებული იყოს შეკვეთის ღირებულებაზეც. მსგავსი დეტალები უმჯობესია დააზუსტოთ გამყიდველთან და შეარჩიოთ თქვენთვის ყველაზე მომგებიანი შემოთავაზება.

სარემონტო სივრცის დასუფთავების ხარჯები

ხარჯების დათვლისას მნიშვნელოვანია გაითვალისწინოთ სარემონტო სივრცის დასუფთავების ხარჯიც. მიუხედავად იმისა, რომ ნარჩენების გატანაც დასუფთავების კომპონენტია, რემონტის შემდგომი დასუფთავება მაინც ცალკე გასათვალისწინებელი საკითხია. აპრობირებული პრაქტიკაა, სპეციალიზებული კომპანიის დაქირავება, რომელიც საკუთარი ხსნარებითა და მოწყობილობებით ასუფთავებს თქვენს ფართს. ასევე, მიღებული პრაქტიკაა კერძო პირთან შეთანხმება ან საკუთარი ძალებით ფართის დასუფთავება. ალტერნატივებს შორის გადაწყვეტილება უმჯობესია, თქვენივე პრიორიტეტების შესაბამისად მიიღოთ. კომპანიის დაქირავება შედარებით მაღალ დანახარჯებს უკავშირდება, თუმცა თქვენი საზრუნავი მხოლოდ ამ ხარჯით იქნება შემოსაზღვრული. თუ კონკრეტულ პირს დაიქირავებთ, შესაძლოა მომსახურების საფასური იმაზე ნაკლები იყოს, ვიდრე კომპანიის შემთხვევაში, თუმცა სრულ დასუფთავებას შესაძლოა,  უფრო მეტი დრო დასჭირდეს, ვინაიდან მხოლოდ ერთი ადამიანი იმუშავებს გუნდის ნაცვლად. კერძო პირს დაიქირავებთ თუ თქვენ თავად გადაწყვეტთ დასუფთავებას, მნიშვნელოვანია, დაითვალოთ დასუფთავებისთვის საჭირო ხსნარებისა და აღჭურვილობის ღირებულებაც. თუ თქვენ ფართომასშტაბიანი სარემონტო სამუშაოები ჩაატარეთ, სივრცის დაბინძურებაც მაღალი იქნება, შესაბამისად დაგჭირდებათ კედლების, კაფელ-მეტლახის, კარ-ფანჯრის საწმენდი ჯაგრისები და ხსნარები. ამ ყველაფრის შეძენა შეიძლება საკმაოდ ძვირი დაჯდეს, ამიტომ, მნიშვნელოვანია ყველა ხარჯის გათვალისწინებით მიიღოთ მომსახურების შეძენა-არ შეძენის გადაწყვეტილება.

გაუთვალისწინებელი ხარჯები

როგორ დეტალურადაც არ უნდა დაგეგმოთ შესაძლო ხარჯები, სარემონტო სამუშაოების დაწყების შემდეგ, როგორც წესი, ბევრი ისეთი წვრილმანი ხარჯი იჩენს ხოლმე თავს, რომელიც თავიდანვე გათვალისწინებული არ ყოფილა.

შეიძლება რემონტის მსვლელობისას დიზაინის ცვლილება გახდეს საჭირო ან თუნდაც გაუთვალისწინებელი შემთხვევის წინაშე აღმოჩნდით. ეს ყველაფერი, რასაკვირველია, დამატებით ხარჯებს უკავშირდება. იმისთვის, რომ ამ მოვლენებმა თქვენი სამუშაოები არ შეაფერხოს, სასურველია, თუ თქვენ მიერ დაგეგმილ ხარჯებს მათი მთლიანი მოცულობის 10%-დან 30%-მდე თანხასაც დაუმატებთ, როგორც გაუთვალისწინებელ ხარჯს. ამ რეზერვის შექმნა დაგეხმარებათ მშვიდად შეხვდეთ ყველა გაუთვალისწინებელ მოვლენას.